भगवती माविमा दिवा खाजा कार्यक्रमको प्रभावकारिता
नारायण राई
बेलबारी – सरकारले सामुदायिक विद्यालयका लागि दिवा खाजा कार्यक्रम ल्याएको छ । जुन कार्यक्रमले गर्दा विद्यालयमा अध्ययन गर्न आउने बालबालिकाहरूले दिउँसोको खाजा विद्यालयका खाने गर्दछन् ।
भगवतीमा प्रारम्भिक कक्षादेखि पाँच कक्षासम्मका विद्यार्थीहरूलाई खाजा दिने गर्दछन् । भगवती मोरङ्गको बेलबारी–३ मा रहेको छ । उक्त कार्यक्रमले विद्यार्थीहरूमा राम्रो भएको बताउँछन् विद्यालयका प्रधानाध्यापक नारायण आचार्य । उनी भन्छन् ‘‘दिवा खाजाको कार्यक्रम नभएको समयमा विद्यार्थीहरू विद्यालयमा ज्यादा ढल्ने(वेहोस) गर्दथे । तर दिवा खाजा कार्यक्रम आएपछि त्यसरी ढल्ने कुरामा धेरै कमी आएको छ । मेरो विचारमा त्यसरी ढल्नुको कारण कति बालबालिकाले घरमा राम्रोसँग खाना नखाने र घरबाट आमाबाले दिएको पैसाले पनि जङ्क फुड खाने हुदा भोको र स्वास्थ्य समस्याले गर्दा ढल्ने गर्दथे । जसको समाधान दिवा खाजा कार्यक्रमले गरिदिएको छ ।’’ थप आचार्य भन्छन्, ‘‘यो कार्यक्रम कक्षा आठसम्म भए राम्रो हुने थियो ।’’
खाजामा कहिले पुरी, सिङ्गडा, चना, चाउमिन, चट्पटे, चाम्रे दिने गरेका छन् । हप्तामा एक दिन फलफुल भनेकोमा त्यो चाँही फलफूल महङ्गो भएकाले नदिएको बताउँछन् । बिहीबार चमेना गृहका दुर्गा बुढाथोकीले विद्यार्थीहरूलाई पुरी तरकारी तयार गर्दै थिए । तपाईंले विद्यार्थीहरूलाई के–के खुवाउँदै हुनुहुन्छ ? भन्ने प्रश्नमा उनले भने ‘‘कहिले सिंगडा, कहिले पुरी, कहिले चटपटे यस्तै दिन्छौँ ।’’ चटपटे चाँही कस्तो दिनु हुन्छ ? भन्ने प्रश्नमा उनले सादा खाल्को दिने गरेको बताए ।
दिवा खाजाका लागि बेलबारी नगरपालिकाले प्रति विद्यार्थी रु १५ दिने र विद्यालयले रु ५ थप गरी रु २० रुपैँयाको खाजा खुवाउने गरेका छन् । वर्षमा एक सय ८० दिन विद्यालयमा खाजा खुवाउने गरेको प्र.अ. आचार्य बताउँछन् ।
उक्त विद्यालयका शिक्षकहरूले विद्यार्थीहरूलाई बालमैत्री पूर्ण शिक्षण शिकाई र व्यवहार गरेको भने पाइदैन । अझै पुरानै शैलीमा भयमा राखेर विद्यार्थीहरूलाई अनुशासनमा राख्ने गरेको देखिन्छ । हाल विद्यालयमा जम्मा विद्यार्थी एक हजार ८८ जना रहेको प्र.अ. आचार्य बताउँछन् । त्यो विद्यार्थी सङ्ख्या भनेको कक्षा १२ सम्मको हो ।
भगवतीमा कक्षा ६ देखि कक्षा १० सम्म हालैका दिनमा अङ्ग्रेजी माध्यममाबाट शिक्षण हुन थालेको छ । यसै वर्ष कक्षा ४ र ५ लाई पनि अङ्ग्रेजी माध्यममा समावेश गर्ने प्र.अ आचार्य बताउँछन् ।