स्वच्छ र स्वास्थ्य तरकारी उत्पादन गर्नु पर्छ : डा. पाण्डे
नारायण राई
विराटनगर– ‘‘विषादी युक्त तरकारीले स्वास्थ्यमा ठुलो समस्या उत्पन्न गरेको छ । अब त्यसको ठाउँमा स्वच्छ र स्वस्थ्य तरकारी उत्पादन र विक्री गर्नु पर्छ । खाने कुरामा विषादी प्रयोग गर्नु भनेको सिधै पेस्तोलले हानेको भन्दा घातक कुरा हो ।’’ यो भनाई कोशी प्रदेशका उद्योग, कृषी तथा सहकारी कोशी प्रदेश कार्यालयका सचिव डा.शरण कुमार पाण्डेको हो ।
आज सदाबहार कृषि मार्टका सञ्चालक सुवास राई अर्गानिक तरकारी उत्पादनको विषयमा कुरा गर्न मन्त्रालय पुगेका थिए । सोही क्रममा सचिव डा. पाण्डेले सो कुरा बताएका हुन् । नेपालमा आजसम्म पनि अर्गानिक तरकारी उत्पादनका लागि सटिफाइ(प्रमाणित) गर्ने कानुन र व्यवस्था नभएकोमा उनले दुःख व्यक्त गरेका थिए ।
उनले केही प्राइवेट कम्पनीहरूले सो क्षेत्रमा काम गर्ने गरेको बाहेक नेपाल सरकारले नै गर्ने भन्ने कुनै व्यवस्था नभएको बताएका थिए । सो विषयमा चाँडै नै काम गरिने पनि उनले बताएका थिए । मन्त्रालयका सचिव सहित अन्य कर्मचारी, पत्रकार, किसानहरू सम्मेलित छलफलमा मानव स्वास्थ्यमा खेलबाड गर्नेहरूप्रति कडा कारबाही गरिने कानुन बनाउनु पर्ने विषयमा समेत छलफल भएको थियो ।
बजारमा तरकारीको सटेज(अभाव) भएको अवस्थामा व्यापारीहरूले आजै विषादी लगाएको बाली टिपेर बजार पुर्याउँछन् । उनीहरूले त्यसो गर्नुको मुख्य उद्देश्य भनेको तरकारी अभाव भएको मौका छोपी ज्यादा पैसा कमाउने अभिलासामा हो ।
कृषकको उत्पादन क्षेत्रमा अनुगमनमा जाँदा एकै छिन पनि विषादी गनाएर बस्न सकिने अवस्था नभएको उपस्थित एक कर्मचारीले बताएका थिए । किसानहरूले आफुले खाने फाल्टौ लगाउने र अरुलाई बेच्ने विषादी युक्त फाल्टौ स्थानमा लगाउने गरेको उपस्थित एकले बताएका थिए । यसरी मानव स्वास्थ्यमा खेलबाड भइरहेको प्रति सरकार नै मोन भएको छलफलको निश्कर्ष थियो । त्यसैले त्यसको नियन्त्रणमा लागि स्वच्छ, स्वास्थ्य र उपभोग युक्त तरकारी उत्पादनमा लाग्नु पर्ने सहभागीहरूको जोड थियो ।